Ramadhaniyatte
16/08/2010
رمضانيات بلوزداديــة
عنان
السلام عليـكم وشـراك خويا عنان صـافا
لاباس الحمد لله ربي يهنيك خويــا
الله يسلمــك خويـا,ومع رمضان صافا؟
والله غير لاباس الحمد لله,نحمدوا ربي ونشكروه
الحمـد لله, قولنا كيفاش راك تجوز نهار رمضان ديالـك؟
نجوزو نووورمـال بصفة عاديـة كيما أنا كيما كل الجزائريين
هـدي علابانا بيها خويا عنـان بصح واش تدير بالضبـط؟
فالليل عنـدك نسهر للزوج ونص,ثلاثـة تاع الصباح نسـحر ونرقـد وانوض مع الظهـر نصلي ونروح نجيبها فـ
CYBER CAFE مع HALF LIFE
القيــرة مع ولاد الحومــة
تسلكها فـ''هالف لايف'' ولا والــو؟
شوية غير كيما بديت نتعلم راني جايبها حبـة حبـة
واش تديـر ثاني ولا من الظهر للمغرب وانت مع ''هالف لايـف''؟
والله غير ماعندي ماندير ياشريـف,ياتصيبـني راقـد فالـدار يا تلقاني نلعب ''هالـف لايف'' مع ولاد الحومة فـ''السيبار كافي'' ولا نشـوف التلفيزيون
واش تشوف فالتليفيزيون؟
راني مع''بريــسون براك'' في جزءه الثاني بديـت نشوفوا ملي دخلنا تربص في اسطاوالي,والله غير عجبني سينيما ياخويا وحكم فيا تاع الصـح
واش من قناة راك تشوفوا فيـها؟
لالا, رانــي نشوفوا فـ
Divx
والسهرة كيفاش راك تجوزها؟
مور التدريبات,نجيـبها فالحومـة نقصر شوية مع ولاد حومة,نلعبو الدوميـن...الخ حتى للزوج الزوج ونص تاع الصباح الواحد يدخل يتسحر ويرقـد
تقضي للدار ولا والــو؟
والله غير والو,القضيان خاطيني
وفالـفطور واش تحب تاكــل؟
البـوراك..البـوراك واللحم لحلـو نموت عليهم,وبلا بيهم تسماطلي الطابلـة ولا بالاك مانفطرش
عنان قالونا عليـك بلي يغلبك رمضان بزااف وتولي ماتضويش؟
لالا ماكاش كامـل منهــا,أنا ورمضان نورمال ونجوز نهاري بصفة عاديــة مانتقلق ماوالــو
زادوا قالونا عليـك بلي تــاكل بزاف صح؟
خـطرات برك ياخو ماشي دايـمن,سورتو كي تتدرب بزاف لازم تاكل مليح يا حبيبي.بصح شكون اللي قالك يرحم والديك؟
صحابـك ياعنان هوما اللي بيعوك
(يضـحك)..اللي قالك عـرفتوا,وأنا نزيـد نقولك بلي ياكل كثـر مني
كي كنت صغير كنت تصوم؟
كنت نصوم شوية ههه خطرات نص نهار برك من 8حتى للـ12,وخطرات نهار كامل بصح تاع اتخبـى وكــول,كنت ''نكــوف روحي'' نقوللهم راني صايم وانا ناكل بالتخبيــة راك تعرف الصغر
والنهار الاول اللي صمت فيه تاع الصح تشفــالو ولا لالا؟
والله مانشفالـو ياخويا,عندها بزااف
كاش حادثـة صراتلك في رمضــان؟
هذ العام في اول ايام رمضان رحت نجيب صحابي من 5جويلية راحو يشوفوا الفريق الوطـني مع الغابون,وفالروتور كي كنا موليين قريب تقلبت بينـا السيارة سترني ربي ياخو والله غير مت بالخلعــة
سلامة راسك خويا عنان والحمد لله خرجت سالامات
الحمـد لله
خويا عنان يعطيك الصحة وصح فطورك فالسهرة ان شاء الله
صح فطورك خويا,وصح فطور كل الجزائريين والبلوزداديين
حاوره شريف كمال
Design by
chabab-belouizdad.org
© 2005, 2006, 2007, 2008, 2009
