 |
|
Ramadhaniyatte
15/08/2010
رمضانيات بلوزداديــة الياس بوكرية
في عدده الثالث استضاف برنامج رمضانيات بلوزداديـة جديد موقع الشباب على شبكة الانترنيت خلال هذا الشهر الكريم اللاعب البلوزدادي ابن بوفاريك الياس بوكرية ,الذي أجاب عن كل أسئلتنا و تحدث بكل صراحة عن يـومياته الرمضانية وكيف يقضيها سواءا مع الأسرة,فالحي,فالتدريبات..... كما تحدث عن بعض طرائفه الرمضانية,كيف يقضي سهرته وغيرها من الأمور التي ندعكم تكتشفونها معنا في هذا الحوار الممتع والشيـق
نسهر للزوج تاع الصباح ,ونوض على العشرة العشرة ونص
نروح نقضي مع الزوجة نحط القضيان ونقلع
مانقدرش نريح فالدار نهار رمضان ونشـم ريحة الشربـة واللحم لحلو....
رمضان مايغلبنيش,ولوكان مايقلقنيش كاش واحد مانتقلقش
نلعب ونقصر مع بنتي ومانشوفش التيليفزيون
مازال ماشريت الزلابيــة والشاربات ماتخطيش من المائدة
فالفطـور مانتشرطش و الزوجة هي اللي تحكـم
عندك برك 30يـوم,30طبــق واللي كليتها اليوم ماناكلهاش غدوة
افتسان هلكنا, برمج مباراة تطبيقية في تيزي وزو على الثالثة تحت درجة حرارة 40 وكاين صحابي اللي فطروا وشربوا الماء
في غانا الميزيرية ماكان والو و 10ايام وحنا نفطروا غير بالاناناس
السلام عليكم خويا الياس
صح خويا صافا
لاباس الحمد لله ربي يهنيك,كيفاش مع رمضـان؟
والله غير رحمة ربي والواحد لازم عليه يستغـل شوية شهر العبادة,الرحمة والمغفرة للتقرب من الله
كيفاش يجوز الياس نهار رمضان؟
نورمال,كيما أنا كيما كل الجزائريين,انوض الصباح نروح نقضي أنا والزوجة ديالي واش كتب ربي,نولي نحط القضيان,نلعب شوية مع بنتي ونقلـع
ويـن تقلع خويا الياس؟
كل خطرة ويـن ياخويا على حساب واش كايـن,المهم مانقدرش نريح فالدار نهار رمضان ونشـم ريحة الشربـة,اللحم لحلو وبقية المأكولات,حبيتني نمرض واقيلا
حتى لمـن تسهر؟
حتى للزوج الزوج ونص تاع الصباح,الواحد يتسحر ويرقـد
والصباح واش من ساعة تنوض؟
الصباح انوض على العشـرة,العشرة ونص
والتيليفزيون تشوف بـزاف؟
التليفزيون مانبرونشيلوش بزاف,سورتو قبل الفطور مانحبش نشوف كامل التليفزيون,ونفضل نريح مع بنتي الصغيـرة نلعب ونقصر معاها على مشاهدة التليفزيون
قالـونا بلي لياس يغلبــوا رمضان بـزاف؟
لالا,ماكاش كامل منها ولوكان مايقلقنيش كاش واحـد ويـدير كاش عفسـة عيانـة مانتقلقش.
أحكينا شوية على بوفاريك ايام رمضان؟
في بـوفاريك رانا نعانيـو شوية يامات رمضان سورتو مع لعشيـة وفالليل,الغاشي بزااف ياخويا,الدعـوة مغلوقـة,وماكاش كامل وين تتحرك بالسيارة
ومع الزلابيـة كيفاش؟
أنا والعائلة الصغيرة ماعندنـا حاجة فالزلابيـة,ولحد الان ونحن في ثالث ايام رمضان ومازال ماشريتهاش
والشــاربات؟
الشاربات لالا, نشريها يوميا وماتخطيـش من الدار ومن مائدة الافطار
والسهرة كيفاش راك تجوزها؟
واش من سهرة,ما كان لاسهرة لاوالــو,رانـا نفطروا على السبـعة والنصف والواحد يكمل لفطور على 8:15 تبقى هديك الساعة قبل التنقل إلى التدريبات نجوزها فالدار مع بنتـي الصغيـرة,توصل9:30 نرفـد الحقيبـة ديالي,نوض السيارة و نروح نجيب كريم معمري ونقلع للـ20اوت لاجراء التدريبات على العاشرة والنصف
فالفـطور واش تاكــل؟
فالفطـور مانتشرطش و الزوجة هي اللي تحكـم ,أنا واش حطت ناكـل عندك برك لازم تنوع 30يـوم,30طبــق واللي كليتها اليوم مالازمش ناكلها غدوة,
اليـاس,واش تفكرك غانا ومباراة اشانتي كوتوكو؟
يا لطيـف, غـانا الشــر والميزيرية,مــاكان والـو,العام اللي مع جياسكا صمنا في غانا قريب عشر ايام واحـد السخانة, زيـد التدريبات على الثلاثة,العطـش, وفالنهار ماكان والو باش تجوز الوقت غيـر الدومين وكي يلحق وقت الفطـور كاين غير الاناناس
عشرة ايام وحنا نفطروا غير بالاناناس أناناس أناناس
في حادثة ستبقى راسخة في ذهني
وهل من حادثـة أخرى؟
كايـن حادثة افتسان اللي عمري ماننساها,افتسان كان مدربي فالجياسكا وفي رمضان دارنا حصة تدريبية في تيزي وزو على الثلاثة تاع لعشية,السخانة كانت واحـد 40ولا كثـر وقام ببرمجة مباراة تطبيقية بين اللاعبين دامت قرابة ساعة ونصف من الزمن,متنا تاع الصح,خلااااص وهناك بعض اللاعبين اللي فطروا هداك النهار وشربوا الماء من شدة العطش والتعب
وانت فطـرت؟
أنا لالا مافطرتش,نحمل السخانة غير ماتكسرش راسك
وشكون هوما اللي فطـروا؟
سمحلي,مانقدرش نقولك,خليها فالسـتر وخلاص
انت وليـد بوفاريك؟
تقدر تقول,جيت هنا وأنا في عمري تسعة سنين
صح كنت تبيع الزلابية ولاالشاربات فالمارشي؟
لالا عمري مابعت الزلابية ولا الشاربات فالمارشي تاع بوفاريك
كلمة اخيــرة؟
صح رمضان كل الجزائريين بصفة عامـة وانصار الشباب بصفة خاصة,واللي نقوللهم باننا سنعمل المستحيل باش نفرحوهم هذ العام ان شاء الله وماعليهم سوى الوقوف وراء فريقهم خاصة في الاوقات الصعبـة
حاوره شريف كمال
|
|
|
|
|
