 |
|
Ramadhaniyatte
09/08/2010
في عدده الاول استضاف برنامج رمضانيات بلوزداديـة جديد موقع الشباب على شبكة الانترنيت خلال هذا الشهر الكريم اللاعب المهاجم والمستقدم الجديد هذا الموسم من اتحاد الحراش رمزي بورقبة المدعو حمزة والذي اجاب عن كل أسئلتنا و تحدث بكل صراحة عن يـومياته الرمضانية وكيف يقضيها سواءا مع الاسرة,فالحـومة,فالتدريبات..... كما تحدث عن بعض طرائفه الرمضانية,كيف يقضي سهرته وغيرها من الامور التي ندعكم تكتشفونها معنا في هذا الحوار الممتع والشيـق ذو الطابع الهزلي
بورقبــة:
أنـا و رمضان زوج يهلكني تاع الصح ومانقدرلـوش
منيــن داك نحب نتبليسا باش مانلعبش و''مانونطرينيش'' في رمضان
فالسهرة نجيب الربعة تاع الصباح ونوض ساعة,ساعة ونصف قبل الاذان
في رمضان ماندير والو غير صلاة ورقاد, صلاة ورقاد
التراويح عمري ما سمحت فيهم
لوكان أنوض على العشرة نهار رمضان بالاك نهبل ولا نموت ولاكشما يصرالي
فالمارشي تاع زرالــدة كل 5دقايــق دبزة الدعوة تتقلب والناس كـامل يغلبها رمضان وأنا خاطيني الدبزة
الحاجة مباركة لعجــوز دايرتلي كلــش بصح انا نبقى نحوس غيـر على السبـة باش نقلبها
نموت على اللحم لحـلو تــاع لعجوز مانلقاهش فالطابلة تنوض ''القيرة''
سعيد شهاب يموت على الشربة تاع لعجوز وانا رايح انزهيه بيها
السكاتشات نموت عليهم, نشوف البرامج الدينية والمسلسلات ماعندي حاجة
انا ومراد ابطال العالم فالدومين,يحيي توكوتو بمثابة الاب ورضا على العام جايبينها موراه
سأرسل الوالدين لاداء مناسك الحج في البقاع المقدسة
عند اجرائي عملية الجراحية اصبح منزلنا كأنه ملعب''لافيجري"
خير الكواسر لن انساه طوال حياتي,شارف حرمني من رده لهم اما البلوزدادييون نقوللهم ماتكسروش راسكم انا وصايبي نزهوكم
ألــو''وي" خويــا حمزة صافا حبيبي؟
لاباس الله يهنيك خـويا كمال, قولـي كاش تصاور؟
مارانيش''مكونيكتي" ياحمزة كي ندخل نبعثعملك فالفايس بووووك كي العادة
ربي يحفظك حبيبي وتعجبني كي تتهلى
بلا مزيـة خويا وماكاين حتـى مشكـل,قولي كاش جديد؟
والله غير راهي ميتة الدعوة هد اليامات,غير لقديـم وحتى السيراج خلاص باش نسيرجوه
غـدوة ان شاء الله رمضان وصعيبة الدعوة شوية مع السخانة.
ماتفكرنيش يرحم"الشيـخ"أنـا و رمضان زوج يهلكني تاع الصح ومانقدرلـوش ماعلاباليش علاش
ومع الــبالون كيفاش؟
ياودي اسكت برك روح سقسي عليا فالحراش يحكيولك, ليماتش تاعي في رمضان ميت,والـو شغول عمري مالعبت بالون ومنين داك نخمم ونحب نتبليسا باش مانلعبش و''مانونطرينيش'' في رمضان سورتو فالنهار الله غالب ياخويا مانقدرش انا داير هكذا
راك سلكتلها هذ العـام
رحمة ربي ياخو وشحال فرحت كي ماداروش الشمبيونا في رمضان هناوني ياخويا يعطيهم الصحـة
و فالحـومة كيفاش تجوز رمضان
فالحومة نووورمال,كــالم نضحك نقصر,انتيك وبيـان عندك برك نسـهر شوية و نرقد بزاف
حتى لمن تسـهر؟
نجيب الربعة تاع الصباح نورمال وكي زادو نحاو الشمبيونا هناوني رحمة ربي
وعلاقداش تنوض؟
كل خطرة كيفاش,منين داك على الثلاثة وخطرات على الربعة وكاين يامات وين انوض ساعة,ساعة ونصف قبل الاذان
تسمى ماراكش تصوم نتايا,جايبها غير الـرقاد..بزاااااااف
نورمال ياخويا,واش تحب تديـــر بصح عندك حاجة وحدة وهي الصلاة اللي مانراطيهاش
كيفاش ترقد من الربعة تاع الصباح حتى للربعة تاع لعشية وتقولي مانراطيش الصلاة؟؟ والظهر والعصر راك تصليهم راقـد واقيلا؟
لالا تسمى انوض انصلي ونعاود نولي نرقــد
اه قـولي هكذا مع اللول, تسمى انت رمضان تجوزوا غير صلاة ورقاد, صلاة ورقاد
هديك هي ياخـويا شريـف راهي رايحة غير صلاة ورقاد, صلاة ورقاد
وفالسهرة الافلام والسكاتشات الجزائرية ولا التراويح؟
التراويح التراويح عمري ما سمحت فيهم ياخويا ملي كنت صغيــر بصح هذ العام والله غير مشكل تع الصح
واش من مشكـــل؟
التدريبات فالسياربي نبداوهم كل يوم على العشرة ونصف فالسهرة وهو مايعني ان التراويح راحو هذ العام
وكيفاش تدير انت,تولي ماتجيش للتدريبات وتروح تصلي التراويح ؟
نجي محتمة ياشريكي, بصح لوكان يديرونا التدريبات على 12 تاع الليل مور التراويـح مليحة بزاااف عمل وعبادة
نسقسيك حمزة, كاش نهار نضت على 8تاع الصباح في رمضان.
مهبووول انتايا,8تاع الصباح واش قالولك رايح نحارب واقيـلا,تــأمن غدوة''الاربعاء'' عندي وليد خـويا باش نديه للسبيطار في بن عكنون عندو موعد الصباح على التسعة,كي سمعت غدوة رمضان مديت الـمفتاح لخويا وقتلو انت اديه ولا دبر راسك بيه أنا مانوضش
ربي يجيبلوا الشفـاء وليد خـوك
أمين يارب العالمين ولجميع المسلمين
حمزة, نديروها ياسيدي راك نضت مثلا على العشرة تاع الصباح في رمضان واش راك رايح تديـر؟
لوكان ننوض على العشرة نهار رمضان بالاك نهبل ولا نموت ولاكشما يصرالي,ودير في بالـك مليـح بلي من المستحيلات الخمسطاش انو حمزة ينوض الصباح نهار رمضان موحال يصرا هذ الشئ
وقتاش يغلبك رمضان تاع الصح؟
كي تبقى هديك ربع ساعة للأذان نموت ياخـويا,رغم ان الحاجة مباركة لعجــوز''ربي يطوللها في عمرها''دايرتلي كلــش بصح انا نبقى نحوس غيـر على السبـة واش ماحطتش ولا واش ماداراتش باش نبدا نضارب معاها
تسمى''القيــرة''مع لعجوز؟
والله غير''القيرة'' مع لعجوز, بصح قبل الفطور بربع ساعة برك اومبعد غير يخلاص الفطور خلاص
كيفاش تجوزوا رمضان في زرالدة ؟
نجوزوه نورمــال بصفةعادية وجد طبيعية كيما حنــا كيما كل الجزائريين
وكاش دبزة فالحـومة نهارات رمضان؟
غيــر هي''' سورتو''' فالمارشي تاع زرالــدة كل 5دقايــق دبزة الدعوة تتقلب والناس كـامل يغلبها رمضان
وانت كاش خطرة خلطتها مع كاش واحـد؟
بعيد الشـر,خوك عاقل وليد فاميليا وخاطيه المشاكل صح نتقلق ونزعف شوية بصح الحمد لله في حياتي عمري ماضاربت ولاخلطتها مع كاش واحد خاطينا الدبــزة
ومع القضيان كيفاش؟
أنا و القضيان زوج,جامي قضيت في حياتي حتى فالافطار ومانقضيش تحوس نقضيلك في رمضان وانا اللي نوض ساعة قبل الاذان
وشكون اللي يقضي فالدار؟
الحاجــة والشـيخ ربي يطوللهم في عمرهم هو الي مستكلفين بكلش
تسمى انت ماتدير والو؟
في رمضان انا ماندير والو غير الرقاد الصلاة الفطور والتراويح
واش تحب تاكل في رمضان؟
في رمضان ياخويا اللحم لحـلو تــاع لعجوز مانلقاهش فالطابلة تنوض ''القيرة'' وكاين ثاني الشربة اللي مانحبهاش فالحقيقة بصح تاع لعجــوز نموت عليها أنا و المناجير سعيد شهاب اللي يموت عليها كثر مني واللي نقولوا رايح نزهيك بالشربة تاع لعجوز بلا ماننسى البوراك تاع الخطيـبة ديالي تعود نزعف علينا ثـاني
والتليفزيون واش تحب تشوف في رمضان؟
السكاتشات ياخويا نموت عليهم
والبرامج الدينية ؟؟
ايـه نشوف البرامج الدينية وخاصة في السعودية اللي يفطروا قبلنا وهو مايسمح لي بمشاهدة التراويح وخاصة ترتيل السديس الله يبارك
والمسلسلات أتبع شوية ولا والو؟
المسلسلات ماعندي حاجة فيهم, من نهار راحت شفيقة المسلسل اللي كنت نموت عليه خلاص
والسهرة فالحومة كيفاش تجوزها؟
نجيبها مع الدومين أنا و صاحبي مراد واللي يقابلنا نكسلوه ونطيحو عليـه فعمرنا ماخسرنا لاننا''نتريشيـو'' بزاف وولاد الحومة ماتحلبوناش
كيفاش''تتريـشيــو"؟؟؟
هدي تبقى بيناتنا,هذا مراد صاحبي, بكري كان يلعب معايا في زرالدة أصاغــر وكلمة السر تاعنا هي ارقام اللاعبين اللي كانو يلعبوا معانا أنذاك,فمثلا أنـا كي نجي رايح''نـديمـوندي سانــك 5"نقولو النيميرو تاع الجوار اللي كان يلعب معنا و يرفد رقم 5 ( وسموا دادي) انا نقول لصاحبي مراد"واش دادي صافا دادي'' هو يعرف بلي راني''نديموندي سانك'' ويبداو الشرات ياحبيبي
وبهذه الطريقة احسن لاعب فالعالم تاع الدومين مايربحناش
تلعبوا غير الدومين برك؟
لالا كاين المباريات المصغرة المثيرة تاع ''يحيي توكوتو" نحب نشوفهم ونجوز بيهم الوقت
يحيي توكوتو هذا وليد حومة و من صغري وهو يتبع فيا وفالمشوار ديالي في كل الفرق التي لعبت لها نعتبروا شغول الشيخ بــابــا وكنت حايب نجيبوا نهار سينييت فالسياربي باش يتصور معايا بصح ماكتبش المكتوب
كاش طوايش في رمضان؟
أواه كاين بزااف ياحبيبي,واش نحكي واش انخلي؟
احكي برك..
نحكيلك هدي,هذا واحد صاحبنا نهبلوه في رمضان ونخرجوه من عقلوا مسكيـن وسموا رضــا على العام جايبينها موراه سورتو في رمضان,خطرة رحنا لبوفاريك باش نجيبو شوية شاربات وزلابية مع ولاد حومة وكانت بقات واحد نصف ساعة للفطور تفاهمنا على راسوا شريناهالو و خدمنالو الخدمة هربنا عليه وخليناه في بوفاريك, حتى الزوالي قريب فطر في دار الرحمة مسكيـن,مزية كان رافد تحتوا الدراهم وجا في طاكسي ب1200دج
ماقلتناش علاش يعيطولك حمزة رغم ان اسمك رمزي؟
هكذا برك, فمنذ ان كنت صغيـرا وانا معروف باسم حمزة سواءا في المدرسة المنزل الشارع او الفرق التي لعبت لها فقط في الوثائق مسجل باسم رمزي
رمزي او حمزة ايهما تفضـل؟
افضل حمزة خيـــر
حمزة قالونا بلي كنت تصوم بـنص نهار.كاينة منها؟
شكوون اللي اعطالكم هذ القرعــة
الزواوش
وحدكم انتوما ياصاحبي, صح كاين منها حيث كنت نصوم 15 يوم في رمضان,نص نهار نص نهار نص نهار ونحسبهم ونجمعهم
وخليني نحكيلك هادي.
روح
خطرة كنت كادي''أشبال'' في زرالدة وفي رمضان اداونا نجريو فالبحر وانا كنت صايم مت بالعطش و ماقدرش نصبـر وليت''نكـوف''في روحي نشرب شوية ماء ونقول راني صايم نزيد نجري نشرب شوية ونقول راني صايم
وكي رحت للدار ماقلت لحتى واحد وفطرت معاهم شغوول صمت رغم انني نهار كامل وانا نشرب بالتخبية
اول خطرة صمت نهار كامل؟
يفكــر.....كان في عمري تسعة سنوات وكنت نقرا السنة الرابعة لانني دخلت نقرا وانا في عمري 5سنين
واش حسيت كي صمت اول يوم في حياتك؟
ماتتقعدش قريب مت هداك النهار من الجوع والعطش وسلامة الحاجة اللي كانت تعس فيا وتصبرني
ماذا تريد ان تضيف؟
بخصوص الوالدين,فقد كنت انوي ارسالهما الى البقاع المقدسة لاداء مناسك العمرة وماكتبش المكتوب
لكنني سارسلهما باذن الله لاداء مناسك الحج هذا الموسم ان شاء الله وهذه هي امنيتي الوحيدة في الحياة
كلـمة اخيــرة؟
اتمنى ان اكون فـأل خير على البلوزداديين وافرحهم كما كنت افرح الكواسر
واتمنى من الجمهور البلوزدادي ان يحتضنني كما احتضنني الـكواسر الذي لن انسى خيرهم علي طوال حياتي فعند اجرائي عملية الجراحية اصبح منزلنا كأنه ملعب''لافيجري" من كثرة الزوار وكل الحراش رحلت عندي واعدهم بانني ساستقبلهم بالورود خلال لقاء الشباب والحراش حتى ارد لهم ولو1/100 من خيرهم الذي لم يتركني شارف ارده لهم
اما البلوزدادييون نقوللهم ماتكسروش راسكم ورايحيين نديروا حالة ان شاء الله انا وصايبي والبقية ونزهوهم خاصة في الداربيـات
حاوره شريف كمال
|
|
|
|
|
