 |
|
Ramadhaniyatte
12/08/2010
حسين حروش الضيف الثاني لرمضانيات بلوزداديـة
في عدده الثاني استضاف برنامج رمضانيات بلوزداديـة جديد موقع الشباب على شبكة الانترنيت خلال هذا الشهر الكريم اللاعب حسين حروش,ابن باب جديد والذي اجاب عن كل أسئلتنا و تحدث بكل صراحة عن يـومياته الرمضانية وكيف يقضيها سواءا مع الاسرة,فالحـومة,فالتدريبات..... كما تحدث عن بعض طرائفه الرمضانية,كيف يقضي سهرته وغيرها من الامور التي ندعكم تكتشفونها معنا في هذا الحوار الممتع والشيـق ذو الطابع الهزلي
في رمضان غير الرقاد والتليفيزيون
نشــوف الافلام الهنديـة,وقناة زي أفلام ماتخطينيش
نمــوت على البوراك والفلان,نتـبـع باب الحارة يوميـا,والسهرة فاسطاوالي والابيار
كنت نصوم15يوم في رمضان كل يــوم من الـ8 الـى الـ12
المولوديــة نربحوهم,وسأعبث ببابوش
ألـو"وي"خويا حسين السلام عليــكم
وعليكم السلام صح خويا صافا خو
والله غير بيان الحمــد لله,وانت صافا؟
لاباس,الحمد لله, الله يهنيك
ومع رمضان كيفاش,شحال راكم دايرين؟؟
(يضحـك) أواه راني طايح عليه ياشريكي غير ماتكسرش راسك,أنا رمضان يخرج عليا وعمرو ما يغلبنــي
صحـا قولنا كيفاش يجوز حسين نهار رمضان تـاعو؟
نجوزو كيما كل الجزائريين,غير الرقاد والتلفزيون ياشريكي واش حبيتنا نديروا
حتــى لمن تســهر؟
فالســهرة مــور صلاة التراويــح اللي مانفرطش فيها,نجيب السحور مع ولاد الحومــة,القصرة,الضحك, القلابـز,الدوميـن,التحـواس ,خطرة نجيبوها فاسطاوالي خطرة فالقبـة,الابيار كل خطرة ويــن
وعلاقداش تنوض الصبــاح؟
أنوض على العشرة,العشرة والنصف
راك تنــوض بكري,حسيـن؟
لالا,أنـوض برك بـاش نروح نقضي للدار هنـا من جامع ليهود كامل واش يسحقــوا للفطور ونولي نرقــد
واش تقضي كامــل؟
الـخبز,لحليب,شوية خضرا,شويــة لحم,الزيــتون,الديــول,الفلان,لفريــك وكامل واش يسحقــوا,اومبعد نولي للرقاد والتليفزيون
واش تشوف فالتليفزيون,برامــج دينيــة واقيل؟
لالا, نشوف الافلام الهنديـة ياخو,وقناة زي أفلام ماتخطينيش
تسمى نهار كامل وانت مع الافلام الهنديـة؟
لالا نشوف فيلم, ولا زوج تاع لهنودة هذا ماكان,حتى يبدا باب الحارة في جزءه الخامس أومبعد ندورها ''بلايستايشن''
واش تلعب ف''البلايستايشن''
نلعـب بالــون واش حبيتني نلعب
باش تلعــب؟
نلعب بـ''فالونسيـــا''
علاش''فالونسيا'' بالضبـط؟
فالونسيا قـوة ياشريكي وزيـد قديمــة هديـك تاع تلعب بالريال,البرصا,مانشيستر الواحد يبدل شويــة
ماتدير والو من غير الرقاد,التليـفزيون و البلايستايشن؟
واش حبيتنا نديروا ياشريكي,خاصة مع السخانـة هدي والله غير تخرج تموت,عندك برك هديك الساعة ساعة ونصف قبل الاذان نخرج للحومـة نقصر شويـة ونهبل صحابي اللي يغلبهم رمضان ونلعبلهم على المــورال
وكي نجي داخل للدار ندي شوية زلابية,قلب اللوز,شاربات,قازوز,التمـر....الخ
فالفطــور قالونا تاكل بزااف؟
والله والو ياشريكي,شوية شوية ...ناكل نورمال,ماكاش منها كامل هدي تاع ناكل بزاف
واش تحب تاكل؟
البوراك..البوراك...بلا بيــه مانفطرش,وحتى الفلان نمووت عليــه نضرب 3-4 نورمال
واش تشوف فالتيليفزيون مور لفطـور؟
نشوف السكاتشات تاع الدزيار ولوكان يعاودونا الجمعي فاميلي مليحة بزاف,حتى ناس ملاح سيتي ياخو والله غير ضحكة وفرجــة
رمضان مع التدريبات والمباريات كيفاش تحس روحــك؟
هذ العام والله غير رحمــة ربي ياخو,ماكاش الشمبيونا في رمضان وزيــد التدريبات فالليل.نحاونا كامل المشاكل تاع الصيام
وكي تلعب وتتدرب نهار رمضان على الساعة الثالثة,تلقى روحك؟
ماتفكرنيش يرحم الشيـخ , كنت نمووووت من شدة التعب والعطش ومانلقاش كامل روحي
قالونا بكري كنت تصوم نص نهار؟
صح كاينة منها هدي ياخو,كي كنت صغير كنت نصوم15يوم في رمضان كل يوم من الـ 8حتــى للـ 12 هههه
راك شافي على اول مرة صمت في حياتك؟
أول مرة صمـت؟؟؟والله ماراني شافي عليـها ياشريكي.....واش فطرت البارح نسيت تقولي أول مرة صمت فيها
حسين,لوكان تنوض عطشان على الستة تاع الصباح نهار رمضان ومايجيكش الرقاد والسخانة ربعين واش تدير؟
وشنـــوا...مهبووول انتايا,والله غير انموووت وشبيك ولا نرووح للامام تاع جامع كتشاوة نقولو أذنـلي المغرب على 6تاع الصباح ولا نفطـر
حادثة طريقة صراتلك في رمضان؟
(يضحـك)خطرة هبلت المدرب تاعي في بارادو,بوهلال,هو يغلبوا رمضان مسكين وأنا زدت كملت عليـه خرج من عقــلوا أو ولا مايضويش
انصار الشباب بطالبون بالفوز على المولودية وأن تسقط بابوش ارضا؟
المــولودية نكسلوهم هذ العام ان شاء الله خاصة مع الاستقدامات اللي درناهم وبابـوش غيـر ديرو فالجيـب وسأعبث به كي درتلـو مع النـهد بالاك ماتصورهاش برك ههه
صح فطورك حسين
الله يسلمك,وصح فطور كل البلوزداديين والجزائريين
حاوره شريف كمال
|
|
|
|
|
